شاركت الفنانة الشابة ملك زاهر، رسالة مؤثرة لشقيقتها ليلى زاهر، بعد زواجها من المنتج هشام جمال، في حفل زفاف لاق رواجا كبيرا على الساحة الفنية.
وكتبت ملك عبر حسابها الشخصي على إنستجرام: “محدش فيهم عاش اللي أنا وإنتي عشناه، من أول ضحكة وإحنا أطفال لحد لحظة كتب كتابك كل لحظة في الفيديو ده هو عمر كامل بينا، هو حب، و أمان، وضحك، و مشاركة، علاقتي أنا وإنتي مش شبه أي حد”.
وتابعت: “مش مصدقة إن الوقت جري كده كنّا لسه صغيرين، وبنتخانق على اللبس، وبنستخبى من ماما، وفجأة لقيتك لابسة فستانك الأبيض، أحلى عروسة شافتها عيني”.
وأضافت ملك: “أنا بحبك أوي، حب مفيهوش شروط ولا حسابات، مع إن الفرق بيننا مش كبير، أقل من سنة بس طول عمري حاسة إنك بنتي مش أختي.. امبارح… بنتي الي كانت بتتجوز مش اختي، وأنا الفرحة مش سيعاني، بس في نفس الوقت وحشتيني قوي من دلوقتي، إنتي مش بس أختي حبيبتي… إنتي أحلى حاجة حصلتلي في حياتي. وهفضل دايمًا أقرب واحدة ليكي، أحنّ حضن، وسند من غير كلام”.
واختتمت: “ربنا يسعدك يا روحي… ويخليكي دايمًا قلبك مرتاح مع عريسك الي ربنا يحفظهولك و يفضل يسعدك العمر كله وانا دايمًا جنبك… في كل خطوة بحبك يا عروستي الحلوة، اللهم احفظ أختي وزوجها من كل سوء، وبارك لهما في حياتهما، واصرف عنهما الحسد والشر، وأدم عليهما السكينة والمودة”.
واحتفل الثنائي الفني ليلى أحمد زاهر والمنتج هشام جمال بزفافهما مساء الأربعاء في حفل استثنائي أُقيم عند هرم سقارة الأثري، وسط أجواء ساحرة تحمل طابع الحضارة الفرعونية، بحضور نخبة من نجوم الفن والإعلام والمجتمع.
إضاءة هرم سقارة
وشهد حفل الزفاف إنارة هرم سقارة باللون الأحمر لظهوره بشكل متناسق، يأتي هذا الحفل بعد أيام من احتفال الثنائي بعقد قرانهما في 14 أبريل الجاري، في أجواء عائلية مميزة شهدت حضور عدد من المقربين منهم رئيس النادي الأهلي محمود الخطيب.
بكاء أحمد زاهر
بينما خطف الفنان أحمد زاهر الأنظار بلحظة بكائه تأثرًا بزواج ابنته، وهو المقطع الذي انتشر بشكل واسع على مواقع التواصل الاجتماعي، وتصدر محركات البحث خلال الايام الماضية.
0 تعليق