كشفت الإعلامية دعاء فاروق عبر صفحتها الرسمية على موقع التواصل الاجتماعي الشهير “فيسبوك”، عن تفاصيل زيارتها للفنان الكبير محمد منير. 

وقالت دعاء فاروق: “على غرار الصوت الشهير اللي بيقول أنا طلعت في التلفزيون.. أنا ممكن اعمل صوت بنفس الانبساط والدهشة بيقول أنا زرت الكينج محمد منير في بيته!!! وعشان متحتاروش وتقولوا إيه اللي جاب القلعة جنب البحر الموضوع ببساطة إن ريهام إبراهيم صديقتي الجميلة كانت بتزورني امبارح للاطمئنان على ديدو ابني، وفي وسط القعدة تركتها ودخلت المطبخ.

وإذا بروكي بنوتي جت تقولي الحقي يا ماما ده ريهام بتكلم محمد منير في التليفون عادي.. قلت لها آه يا روكي ما ريهام من أصدقائه المقربين جدا منذ سنوات طويلة.. ودخلت على ريهام وقلت لها كواحدة مصرية أصيلة ممكن تحشر نفسها في مكالمة لا تخصها بتاتا: سلميلنا عليه يا ريهام وقوليله إن كلنا بنحبه.. وأعتقد ده العادي بتاع أي كائن مصري سامع صوت محمد منير طالع من السماعة اللي جنبه.. فإذا بريهام تقول له طب خد دعاء فاروق عاوزة تكلمك وكانت مفاجأة لطيفة لأنه لطيف جدا جدا لدرجة إني لما بقول له على فكرة جوزي بيحب يسمعك جدا وفعلا هو مطرب عماد المفضل قال لي بمنتهى اللذاذة ”الله الله".

خلصت المكالمة بكلمات الثناء اللطيفة وأنهيتها بإن شاء الله تيجي فرصة وأشوف حضرتك قريب فكانت المفاجأة إنه قال لي اتفضلي نوريني مع ريهام بكره".

وتابعت دعاء فاروق: “نجم كبير وقيمة كبيرة وعلى قدر نجوميته على قدر تواضعه ولطفه الشديد في استقبالنا.. وفرحت جدا لما قال لي إنه اتفرج عليا النهارده الضهر في برنامجي.. في الصورة ريهام إبراهيم اللي بشكرها بجد على المفاجأة والزيارة الحلوة دي وعازفة الهارب الجميلة ياسمين حربي اللي اتعرفت عليها من خلال ريهام إبراهيم من سنتين وحبيتها جدا جدا.. النهارده ٥ مايو ٢٠٢٥ يوم أحب أوثقه يوم زيارة الكينج محمد منير”.