كتبت ملك أحمد زاهر من خلال خاصية القصص القصيرة على حسابها الرسمى بموقع إنستجرام: أنا عمري ما كنت بنزّل غير الحاجات اللذيذة أو الهزار أو أي حاجة إيجابية من الآخر ولما كنت بحب أنزل حاجة سلبية كنت باخدها بهزار وبنزلها close friends وبهزر بيني وبين صحابي.

تابعت: بس بجد حاسة أن الفترة الأخيرة بيجيلي كومنتس كلها مانتي عايشة ومبسوطة واحنا مش عايشين وايه كل إللى انتوا فيه وحاسة أن في ناس بصة على أتفه الحاجات إللى ممكن تكون عندي اللي بتبسطني زي مثلا اني انزل اروح الجيم أو اخرج مع صحابي أو يكون شكلي حلو انا رايحة ايفينت معين.

أضافت: حبيت بس أقولكم أن الحياة مش وردي أنا بقالي 3 أيام تعبانة شوية وعندي حاجة لحد دلوقتي مش فاهمين سببها وجت فجأة وفي حوالي نص ساعة قبلها كنت زي الفل ومن ساعتها مش عارفة أنزل أو حد يشوفني باللي انا فيه ده ونفسيتي وحشة اوي انا بحكي الكلام ده عشان تعرفوا بس أن حياتي فيها الحلو والوحش والله زي أي حد بس أنا بحب دايمًا أشيّر الحلو بس وغالبا ده غلط فقررت أشارككم كمان الوحش.

إختتمت: ومع أن اللي بيحصلي دلوقتي انا بحمد ربنا عليه وعارفة إنه بإذن الله ها يكون حاجة بسيطة وإن شاء الله هاخف وكله هيكون تمام بس هو مخلي نفسيتي وحشة أوي حقيقي كل إللى طالباه انكم ما تحكموش على حد من السوشيال ميديا أو من ظهوره في أي حاجة لأنها بتوري بس يمكن 20% من حياته ووادعولي أخف بسرعة شكرا .. والهدف من الإستوري دي مش أن أي حد يقلق لأن الحمد الله أنا كويسة وإن شاء الله إللى عندي ده ليه حل وانا تمام مافيش حاجة مقلقة انا بس حسيت اني محتاجة أشارك الوحش زي ما بشارك الحلو مش أكتر.

يمكنك مشاركة الخبر علي صفحات التواصل