كشف المخرج كريم الشناوي عن حقيقة تقديم جزء ثان من مسلسل “لام شمسية” وذلك بعد نجاح العمل فى رمضان المنقضي. 

وقال كريم الشناوي، خلال استضافته في برنامج “ضيفي”، الذى يقدمه الإعلامي معتز الدمرداش: “أنا مبحبش الأجزاء الثانية، ممكن بعد 7 سنوات مثلًا أعمل جزء ثاني، لكن في العموم مبحبش أضغط على العمل عشان أطلع منه فكرة جزء ثاني، كمان أنا معنديش طاقة للأجزاء الثانية”.

كريم الشناوي يتحدث عن إش إش 

من ناحية أخرى كشف المخرج كريم الشناوي عن رأيه فى الأعمال الأكثر تريند مثل نجاح مسلسل “إش إش” للمخرج محمد سامي، فى المقابل حقق مسلسله “لام شمسية” اهتماما واسعا وتأثيرا كبيرا فى الشارع العربي.

وقال كريم الشناوي، فى لقاء ببرنامج “ضيفي مع” للإعلامى معتز التوني : "لام شمسية" مش أعلى مشاهدة "إش إش" الأعلى مشاهدة، بس أنا مش عايز أبقى الأعلى مشاهدة مش فارق ليا، الموضوع ليه علاقة بتعريفنا إحنا عايزين نعمل إيه، لما يبقى في مسلسل تاني أعلى مشاهدة أنا دي مش خناقتي، النوعية دي لازم تبقى موجودة في ناس بتحبها وعمري ما بشوف أن المنع حل في السوق وأستاذ محمد سامي أشطر واحد في الحتة دي، أنا معرفش أعملها زيه وهو ميعرفش يعمل اللي أنا بعمله".

كريم الشناوي: السوق لازم يبقى فيه كل حاجة

وأضاف: “السوق لازم يبقى فيه كل حاجة ولو أنا مهتم إني أبقى الأعلى مشاهدة هاخد قرارات مختلفة، بس أنا مباخدش قراراتي إني أبقى الأعلى ممكن أبقى مهتم إني أكون الأهم وإني أعيش أطول لكن في الآخر كل حد بيرتاح في منطقة، والأصل في السوق التنوع وفي الآخر القرار عند الجمهور لو مش عايز عمل مش هيتفرج عليه فمفيش منتج هينتج تاني، والسوق السنة دي كان فيه تنوع وتغيير في الجمهور عايز إيه ودي حاجة بتتغير طول الوقت”.

“لام شمسية” من تأليف مريم نعوم (ورشة سرد)، وإخراج كريم الشناوي، وإنتاج شركة ميديا هب - سعدي وجوهر، ويضم نخبة من النجوم، أبرزهم أمينة خليل، أحمد السعدني، محمد شاهين، يسرا اللوزي، أسيل عمران، ثراء جبيل، صفاء الطوخي، ياسمينا العبد، الطفل علي البيلي، فاتن سعيد، يارا جبران، مصطفى عسكر، بالإضافة إلى ضيوف الشرف علي قاسم، كمال أبو رية، محمد عبده، وإسماعيل شرف.